Mwezi mtukufu wa Ramadhani ni mojawapo ya neema kubwa za Mwenyezi Mungu kwa Waumini. Ni mwezi wa rehema, msamaha ukombozi kutoka kwa Moto wa Jahannam. Mtume Muhammad (S.A.W) Amesema: “Inapofika Ramadhani, milango ya Jannah hufunguliwa, milango ya Jahannam hufungwa, na mashetani hufungwa” (Bukhari na Muslim).

Kwa fadhila kubwa kama hizi, ni jukumu la kila Muislamu kujiandaa kikamilifu kabla ya kuingia mwezi huu, ili kunufaika na baraka zake kikamilifu. Kwa hiyo, maandalizi haya yanapaswa kuwa ya ndani na ya nje.

Kwanza, maandalizi ya Ramadhani huanza kwa nia sahihi na toba ya kweli. Muislamu anapaswa kurejea kwa Mwenyezi Mungu kwa kuomba msamaha kwa madhambi aliyoyatenda, na kuazimia kuacha maasia. Mtume (S.A.W) Amesema: “Yeyote anayefunga Ramadhani kwa imani na kutarajia thawabu kutoka kwa Mwenyezi Mungu, madhambi yake yaliyopita yatasamehewa” (Bukhari na Muslim).
Hadithi hii inaonyesha kuwa toba na ikhlasi ni misingi mikuu ya kufanikiwa katika Ramadhani.

Pili, ni muhimu sana kwa Muislamu kujiandaa kiroho kabla ya kuingia Ramadhani, basi ni muhimu kujitayarisha kwa kuongeza ibada kabla ya kuanza mwezi. Hii inafanyika kwa kuzidisha matendo kama kusoma Qur’an Mtukufu, dhikri na kuswali Swala za Sunna. Kumbuka kuwa Ramadhani ndio mwezi ambao Qur’an imeteremshwa, kama Mwenyezi Mungu alivyosema:  "Mwezi wa Ramadhani ambao imeteremshwa humo Qur'ani kuwa ni uwongofu kwa watu, na hoja zilizo wazi za uwongofu na upambanuzi …."(Surat Al-Baqarah: 185)

Kwa hiyo, kujizoesha kusoma Qur’ani kabla ya Ramadhani humsaidia Muislamu kuipokea Qur’ani kwa moyo ulio tayari na wenye unyenyekevu.

Tatu, maandalizi ya Ramadhani yanahusisha kujitayarisha kimaadili na kitabia. Ramadhani si mwezi wa kujizuia kula na kunywa pekee, bali ni mwezi wa kujizuia na maovu yote. Mtume (S.A.W) Amesema: “Yeyote asiyeacha kusema uongo na kutenda kwa mujibu wa uongo, basi Mwenyezi Mungu hana haja ya yeye kuacha chakula na kinywaji” (Bukhari).

Hadithi hii inabainisha kuwa lengo la kufunga ni kuutakasa moyo na tabia, si njaa na kiu tu.

Nne, Muislamu anatakiwa kujiandaa kijamii kwa kuimarisha uhusiano wake na familia, jamaa, majirani na jamii kwa ujumla. Ramadhani ni mwezi wa mshikamano, huruma na ukarimu. Mtume (S.A.W) Alikuwa mkarimu zaidikatika mwezi wa Ramadhani, kama ilivyoripotiwa: “Mtume wa Mwenyezi Mungu alikuwa mkarimu kuliko watu wote, na alikuwa mkarimu zaidi katika mwezi wa Ramadhani” (Bukhari).
Hivyo, kutoa sadaka, kuwasaidia maskini, na kuwapa watu chakula cha futari ni miongoni mwa matendo yenye thawabu kubwa sana.

Tano, katika maandalizi ya Ramadhani ni muhimu pia kupanga muda kwa hekima. Muislamu anapaswa kupanga ratiba yake ili apate nafasi ya ibada, kazi na mapumziko bila kupoteza wakati. Mtume (S.A.W) Alikuwa Akijitahidi sana katika ibada katika siku hizi, kama ilivyopokewa na Bi Aisha (R.A).

Hatimaye, kujiandaa kwa Ramadhani ni dalili ya uhai wa moyo na ufahamu wa thamani ya nyakati tukufu. Muislamu anayemkaribisha Ramadhani kwa toba, ibada, tabia njema na matendo ya kheri hupata fursa ya kweli ya kubadilika na kuwa karibu zaidi na Mwenyezi Mungu. Ni wajibu wetu sote kuipokea Ramadhani kwa nyoyo safi na nia njema, tukitarajia rehema na msamaha wa Mwenyezi Mungu, ili tuwe miongoni mwa waliopata mafanikio duniani na Akhera.